Беларуская сельскагаспадарчая бібліятэка прыняла ўдзел у 35-й Міжнароднай спецыялізаванай выставе «БЕЛАГРА-2025», якая праходзіла з 3 па 7 чэрвеня.
Бібліятэка сёлета прадставіла некалькі напрамкаў: электронныя інфармацыйныя рэсурсы ўласнай распрацоўкі, найноўшыя друкаваныя дакументы, выдадзеныя навукова-практычнымі цэнтрамі і інстытутамі Аддзялення аграрных навук НАН Беларусі, выбраныя дакументы калекцыі «Беларускія аграрныя выданні пачатку XX стагоддзя» і дэпазітарнай бібліятэкі Харчовай і сельскагаспадарчай арганізацыі ААН, а таксама прэзентацыю, прысвечаную дзейнасці бібліятэкі, і дакументальны фільм «Гісторыя Вялікай Перамогі» ад нашага шматгадовага партнёра Беларускага дзяржаўнага архіва кінафотафонадакументаў.
Электронныя інфармацыйныя рэсурсы, створаныя Беларускай сельскагаспадарчай бібліятэкай, былі прадстаўлены наступнымі рэсурсамі:
- Інфармацыйны паўнатэкставы рэсурс «Партал перыядычных выданняў» - навуковыя перыядычныя выданні Нацыянальнай акадэміі навук Беларусі.
- Інфармацыйны паўнатэкставы рэсурс «Партал выданняў Аддзялення аграрных навук Нацыянальнай акадэміі навук Беларусі» - паўнатэкставы рэсурс публікацый па аграрнай тэматыцы.
- Электронная версія часопіса «Весці Нацыянальнай акадэміі навук Беларусі. Серыя аграрных навук» з поўнымі тэкстамі артыкулаў з 1990 па бягучы год, а таксама зместы выпускаў за 1963-1989 гг.
- Электронная бібліятэка аўтарэфератаў дысертацый па сельскай гаспадарцы і сумежных навуках, выкананых у Рэспубліцы Беларусь - тэматычны паўнатэкставы масіў, які ўключае электронныя копіі аўтарэфератаў з фонду бібліятэкі.
- База даных «Электронны паказальнік прац вучоных-аграрыяў Беларусі», якая ўключае біяграфіі і поўныя бібліяграфіі навуковых прац вядомых дзеячаў аграрнай навукі Беларусі.
- База даных аўтарытэтных запісаў «Навукоўцы-аграрыі Беларусі», якая змяшчае кароткія біяграфічныя звесткі, інфармацыю аб ганаровых званнях, узнагародах і выніках навуковай дзейнасці і інш.
- Зводны электронны каталог бібліятэк Аддзяленні аграрных навук НАН Беларусі.
- АграWeb Беларусь: навука, адукацыя, інфармацыйныя цэнтры (нацыянальны сайт-навігатар па найлепшых аграрных Інтэрнэт-рэсурсах Рэспублікі Беларусь).
- Бібліятэка на далоні. (Сэрвіс MyLOFT – сістэма аўтэнтыфікацыі выдаленых карыстальнікаў электронных інфармацыйных рэсурсаў).
Усе друкаваныя апісанні электронных рэсурсаў забяспечылі QR-кодамі для хуткай загрузкі дадатку, або пераходу на патрэбную старонку сайта. Для нагляднасці побач з рэкламнымі матэрыяламі парталаў і баз даных экспанаваліся друкаваныя версіі электронных рэсурсаў – часопісы, аўтарэфераты, бібліяграфічныя паказальнікі і да т.п.
Нязменную цікавасць выклікалі дакументы калекцыі «Беларускія аграрныя выданні пачатку XX стагоддзя». На гэты раз былі прадстаўлены кнігі, прысвечаныя гісторыі меліярацыі ў нашай краіне, а таксама самыя першыя выпускі серыі «Сялянская бібліятэка». Нягледзячы на папулярна-асветніцкі характар серыі, яна адыграла сваю ролю ў развіцці аграрнай культуры насельніцтва.
Выстаўка «Дакументы ФАО» інфармавала наведвальнікаў аб праблемах развіцця сельскіх рэгіёнаў і сельскагаспадарчай вытворчасці ў сістэме ААН. З 2006 г. Беларуская сельскагаспадарчая бібліятэка атрымала афіцыйны статус дэпазітарыя ФАО ў краіне.
За актыўны ўдзел на «БЕЛАГРА-2025» бібліятэка была адзначана дыпломам і сярэбраным медалём аргкамітэта выстаўкі.
