Харчовая і сельскагаспадарчая арганізацыя Аб’яднаных Нацый (ФАО), пад эгідай якой з 1974 года фарміруецца адкрытая міжнародная бібліяграфічная база даных па сельскай гаспадарцы і сумежных галінах AGRIS , па выніках карпаратыўнага ўдзелу ў 2023 адзначыла актыўных пастаўшчыкоў бібліяграфічных метаданых знакам прызнання і надала права на яго адлюстраванне на вэб-сайце арганізацыі на працягу 2024 года. Знак «Пастаўшчык даных AGRIS 2024» быў атрыманы Беларускай сельскагаспадарчай бібліятэкай.
На пачатак 2024 года AGRIS уключае амаль 14 млн бібліяграфічных запісаў на 200 мовах, перададзеных 483 пастаўшчыкамі даных са 153 краін свету; да больш чым 3 млн запісаў дадзены спасылкі на поўныя тэксты публікацый. Беларуская сельскагаспадарчая бібліятэка ўдзельнічае ў напаўненні міжнароднай базы даных AGRIS з 1994 года. Усяго на пачатак 2024 года ў ёй прадстаўлена больш чым 17,5 тысяч падрыхтаваных Беларускай сельскагаспадарчай бібліятэкай бібліяграфічных запісаў аб беларускіх навуковых публікацыях; больш чым 4,5 тысячы запісаў забяспечаны спасылкамі на поўныя тэксты. Уключэнне інфармацыі аб беларускіх навуковых публікацыях у AGRIS паляпшае бачнасць вынікаў даследаванняў беларускай аграрнай навукі ў міжнароднай інфармацыйнай прасторы. Штогод даследчыкі, спецыялісты і практыкі ў галіне сельскай гаспадаркі і харчавання з усяго свету больш чым 20 тысяч разоў праглядаюць бібліяграфічныя запісы аб беларускіх публікацыях.
Беларуская сельскагаспадарчая бібліятэка, якая з’яўляецца актыўным удзельнікам міжнароднай супольнасці пастаўшчыкоў AGRIS, працягне ажыццяўляць свой унёсак у развіццё гэтай найбуйнейшай галіновай міжнароднай базы даных.